Z Lubina/Lübben. Dwě rědnej góźinje su dožywili žeńske lubinskego zmakanja awtorow ze swójimi gósćimi pśi serbskem literarnem cołnowanju slědny pětk, 7. awgusta, w Lubinje. Mjaztym až jo se cołn pó tšugach Sprjewje na wjacornem słyńcu pśez zelene łopjenowe kšywo se suwał, su pśednjasli někotare wobźělniki wšake teksty w serbskej a nimskej rěcy.

Tam a sem su pśibytne teke serbske spiwy zgłosyli, kótarež jo organizatorka wjacora Gizela Christlowa na akordeonje pśewóźowała. Wóna sama jo nowy spiw wó serbskich powěsćowych figurach napisała, kenž jo měł na tom wjacorku premjeru. Gizela jo teke wjele zajmnego wulicowała wó serbskem žywjenju w zajźonosći a pśibytnosći.

Ilona Noack jo mjazy drugim pśedstajała swójske wulicowańko „Erwins Lagune“ wó wótbagrowanju domowniskeje jsy. To jo wšych pógnuło.

Wót Ingrid Groškoweje su pasažěry cołna słyšali basni wó serbskich nałogach, na pśikład wó rejtowanju wó kołac a łapanju kokota.