Z Města/Cottbus. Na kóńcu togo tyźenja se zachopijo nowa sezona w balokopanju teke w 2. nimskej lize. To buźo teke za Energiju Chóśebuz wjelgin wažny źeń. Pó wjele lětach ga grajo našo mustwo zasej w drugej nejwušej klasy w Nimskej, za tym až běšo južo w lětach 1997 do 2014 toś tej lize pśisłušało.

Energija jo se w slědnych tyźenjach za nowu sezonu pilnje pśigótowała. Pśi tom jo było to nejwažnjejše, z doněntejšnymi a nowymi balokoparjami zestajiś kradu nowe mustwo. Jaden z nowych cłonkow jo 32-lětny Leonardo Bittencourt. Jogo familija ga jo wjele lět bydliła w Žylowje. Jo pśeśěgnuła z Lipska do Žylowa, dokulaž Franklin Bittencourt jo w Chóśebuzu wót 1998 do 2003 pla Energije grał. We tom casu jo wón był ako brazilski balokopaŕ wjeliki lubušk publikuma. Něnto wjeźo jogo syn Leonardo toś tu tradiciju dalej, za tym až běšo jogo nan južo pěś lět dłujko we wšakich mustwach Energije Chóśebuz grał.