Pólska spiwaŕka Zuzana jo z wurědnym wustupom zaguslowała publikum w Starej płachtaŕni. Fota: K. P.Gnujuce grafiki ukrainskego wuměłca Dmytro Kryshovsky.

Z Města/Cottbus. Poetiskim głosam z pódzajtšneje Nimskeje a Europy jawišćo póbitowaś a to powědane słowo, literaturu, muziku a wuměłstwo zwězaś – za to wšo jo se starał prědny L/ost poetry festiwal wót 16. do 18. julija w chóśebuskej Starej płachtaŕni blisko Błośańskego dwórnišća. Pólske, česke, belgiske, ukrainske a hungorske wuměłce su rowno tak wó swójej pódzajtšnej identiśe powědali, rappowali abo spiwali kaž młode poety z nowych zwězkowych krajow a z regiona, mjazy nimi tež Serba Měto Kjarcmaŕ z Chóśebuza a Jonas Pjetaš z Pančic-Kukawy, organizatorka Jessy James LaFleur, ako słuša k nimskej mjeńšynje w pódzajtšnej Belgiskej a „lokalnej matadora“ Cottbuser Lesebühne a Chóśebuski kjarcmaŕski chor. Organizěrowała jo zarědowanje Spoken word akademija gromaźe z ukrainskeju iniciatiwu Sklad n. 5 a drugimi partnarjami.