To jo był ten kokot w Turjeju. Fabian Pingel jo prědny raz sobu rejtował a jo ned głowu kokota wótrył. Wjacor jo młoźina z pśijaśelami a susedami w stanje na sportnišću swěśiła. Fota: L. L. 
Z Turjeja/Tauer. Na slědnem kóńcu tyźenja su te žnjowne swěźenje se zachopili. Něnto se wuźěkuju wšuźi za te dobre žni. Natakt za kokotowu sezonu jo był w Turjeju a Barbuce sobotu a njeźelu w Bórkowach.
W Turjeju jo młoźina pśi rědnem lěśojskem wjedrje łapanje kokota swěśiła. A pśi tom jo wjele młodostnych pomogało. Lětosa jo 19 źowćow w swěźeńskich drastwach a 10 gólcow wó titel žnjownego krala a kralowki wójowało. To jo kradu wjele za Turjej, wósebnje w pśirownanju k zachadnemu lětoju. Tegdy jo jano było šesć rejtarjow a jadnasćo źowćow pódla.
