Pśed 70 lětami, na zachopjeńku lěta 1956, smy z Francojskeje do Chóśebuza dojěli: mój nan, mója maś a ja w jeje brjuchu. Wónej stej se pó wójnje w Pódpołdnjowej Francojskej zeznali a tam sedym lět žywej byłej. Naroźiła som se 28. maju w Chóśebuzu.
Pśed 20 lětami, w lěśe 2006, jo mójo město Chóśebuz 850 lět stare było. Pśi tej góźbje som tencas zachopiła pisaś wó sebje a „mójom“ Chóśebuzu.
How cytaśo žedne wurězki:
Nejskerjej jo Chóśebuz napšawdu mójo město. Mója mama jo to tak kśěła. Pśi wuslěźenju našych familijowych stawiznow som starcyła na wugrono šołty małeje francojskeje jsy blisko Toulouse, źož jo wóna pó wójnje žedne lěta žywa była a źož jo zeznała mójogo nana pó jogo wrośenju z wójnskeje popajźi. Tencas, ku kóńcoju lěta 1955, jo mama pśed wótjězdom z Francojskeje groniła, až co, až jeje góle, to groni ja, se naroźijo w Nimskej. Toś jo šła ze swójim cłowjekom, mójim nanom, do Chóśebuza, źož som se ja w lěśe 1956 naroźiła.
