No, lube źiśi, sćo źinsa južo muzicěrowali? – To jo se pšašał Rěcny centrum WITAJ Chóśebuz pśi lětosnem wuměłskem wuběźowanju. Zwěrjeta na wuběźowańskem plakaśe južo muzicěruju z akordeonom, saksofonom, gitaru, fidlami a banjo. Źiśi teke zgóniju, až dajo wšake muzikowe instrumenty: stśiłkowe, dujaŕske, tastowe, cybańske, perkusijne. A, se wě, jo wažne, naše typiske serbske ako tarakawa, dudy a tśitšunowe guslicki znaś. – Ale kótary instrument by źiśi raźi kśěli graś? ... a tak jo namólowało 33 źiśi w starstwje wót 4 do 6 lět sebje sami ze swójimi nejlubšymi instrumentami. Wóni graju flejtu, fidle, gitaru, gubnu harmoniku. Młogi jo ned cełu muzikowu combo namólował. Jadno źowćo z dešańskeje źiśownje grajo na wiolinje a zwěrjeta byrce a šwikocu z njeju.