Z Města/Cottbus. Pśecej pónjeźele zmakaju se za reju zapalone luźe k serbskemu ludowemu rejowanju w „mittendrin“. Tyźeń pónjeźele su pśijaśele reje na chóśebuske Stare wiki śěgnuli, aby tam k žywej muzice kupki „Serbska reja“, rozmjej k polce, walcykoju, mazurce a serbskim kołam rejowali. Tenraz jo ga samo 100 luźi pśichwatało, pśeto su teke kursisty kompaktnego kursa rěcneje šule pśepšosone byli. A teke gerce pólskego města Iłowa su se gercam a rejowarjam Łužyskego rejowańskego doma pśizamknuli. Rejowański dom Łužyca ma folk a ludowu rejowańsku muziku ze serbskeju Łužycu a z cełeje Europy we swójom repertoire. Zachopjeńkarje wuknu w źěłaŕnicce pód rozpokazanim Gregora Kliema, co wóni mógu ze swójima nogoma cyniś. Komu to njedosega, móžo swój instrument sobu pśinjasć.