Z Města/Cottbus. Kužde lěto pśepšosyjo Šula za dolnoserbsku rěc a kulturu na jaden tyźeń dłujki intensiwny rěcny kurs dolnoserbskeje rěcy w lěśu, a to z pśiběrajuceju licbu pśizjawjenjow. Gaž to tak w pśiducych lětach wóstanjo, by to było dobre znamje za pśichod dolnoserbskeje rěcy. Tomu wjelikemu zajmoju snaź pśinosujo wjeleraki ramikowy program kursa, kenž wopśimjejo pódla historiskich pśednoskow (wó Pawlinje Krawcowej), cytanja (z knigłow „Danka a Janka“ Petry Richterojc), pśedstajenje filmow, literariske pśechójźowanje pó Měsće z Pytkom abo wobźělenje na Serbskem bliźe teke wšake aktiwity, kótarež zapśěgnu kursistow direktnje do serbskeje zgromadnosći a jim zmóžnijo direktnje ze Serbami komunicěrowaś. Tak su kursisty pśepšosone byli na reju z Rejowańskim domom Łužyca ze žyweju muziku kupki „Serbska reja“ na Starych wikach, su mógali se serbski rozgranjaś na modernej pśězy w Serbskem domje abo su mógali swóje nazgónjenja pśi wuknjenju serbskeje rěcy w ramiku źěłaŕnicki projekta SROKA pśinjasć.