Z Města/Cottbus. Lesbijaŕki, šwulne, biseksualne, trans*, inter*, queerne, heteroseksualne a druge su se zmakali sobotu wótpołdnja, 11. julija, na Barlinskem naměstnje pśed měsćańskeju halu a su zgromadnje a měrnje śěgnuli pśez město za akceptancu a mjazsobny respekt. Lětosna Christopher-Street-Day-demonstracija Chóśebuz a Dolna Łužyca (CSD) jo była wjerašk akciskego tyźenja z wokoło 30 zarědowanjami, pśi kótarychž jo wěcej ako 300 bogowych tycowych chórgojow w regionje Chóśebuz, Sprjewja-Nysa a Górna Błota-Łužyca wiźeś było. CSD jo był pód motom „We wjelerakosći zwězane – United in PRIDE“ a wobźělujuce su šli wót Měsćańskeje hale, pśez Stare wiki a naměstno Wušeje cerkwje do centralnego campusa Bramborskeje techniskeje uniwersity Chóśebuz-Zły Komorow a zasej slědk k Měsćańskej hali. To jo była južo 18. CSD-demonstracija w Chóśebuzu. Patronowka togo akciskego tyźenja jo była šołtowka Doreen Mohauptowa. „Se wjaselim, až smějom was w bogatej licbje a tak pyšne a wjasołe wuwitaś.