Z Města/Cottbus. 50 lět statkowanja mimo pśestawki, to jo juž bejna licba lět za jadno towaristwo! A to su kśěli teke gódnje swěśiś. Sobotu, 4. julija, jo Nimsko-serbski ansambel Chóśebuz pśepšosył swójich pśijaśelow, partnarjow a spěchowarjow do Piccolo źiwadła w Měsće na jubilejny swěźeń. Wótgłos jo był, njeglědajucy na dowolowy cas, pśemóžecy. Wušej 100 gósći zbliska a zdaloka jo pśichwatało. Serbskich a nimskich. Staršych a młodšych. A bejna tšocha něgajšnych cłonkow. Ned pśi zachoźe jo jich wuwitała serbska gymnaziastka z klěbom a solu a sobuwuknice su póbitowali sam pjacone tykańce. Dobry zachopjeńk.