Z Města/Cottbus. Wałtoru, 7. julija, jo se wótměło w kulturnem zmakanišću ECK 51 napśeśiwo Měsćańskemu muzeumoju na Dwórnišćowej cytanje z knigłow górnoserbskego žurnalista Jurja Wićaza (1899 – 1974). Dr. Friedrich Pollack, wjednik wótźělenja kulturnych wědomnosćow pśi Serbskem instituśe w Budyšynje z wucbnym nadawkom pśi katedrje za Sakske krajne stawizny Techniskeje uniwersity w Drježdźanach, jo pśedstajił knigły „Von Kamenz nach Palästina. Reportagen aus stürmischen Zeiten“ a jich awtora. Z dokradnosću jo Pollack koncipěrował knigły. Jo Wićazowym biografiskim spomnjeśam dodał pśedsłowo, historiske fota, wobšyrne pśispomnjeśa, wósobowy register a kórtu z Wićazowymi žurnalistiskimi drogami pó Balkanje a Bliskem pódzajtšu w lětach wót 1927 až do 1946. Michał Nuk jo z akribiju jo lektorizěrował górnoserbske knigły ako teke nimske wudaśe. Wobšyrnje wugótowane knigły (Maryna Zhdanko, Jadwiga Schneider) z 512 bokami płaśe 25 euro.