Z Města/Cottbus. Z jogo tšanterowym markom drastwinych źělow jo Serbski muzej wopšawdu nadejšeł pšawu proznicku za wikowanje. Wósym wustajarjow jo bitowało pětk, 10. julija, pśi mjaztym tśeśem wudaśu togo formata nejwšakorakše drastwine źěle. Zeger 15:00 jo był nutśikowny dwór wótwórjony, tak dłujko su musali zajmowane žeńske pśi źurjach wobcakaś. Nawal njeby mógł wětšy byś. Pśedewšym su woglědaŕki to měli wótglědane na wułapotki (Schnäppchen). Wuběrk drastwinych źělow jo mógł se wiźeś daś. Pódla nowo wušytych šorcow, bluzow a cypjelow sy mógał(a) teke stare pókłady namakaś. Chtož njejo hyšći wobsejźeł serbsku drastwu, tomu jo how měł šansu, se z kompletneju swěźeńskeju drastwu abo drastwu za wšedny źeń zasej domoj jěś. Wósebnje wjele kóšulow za swěźeńsku drastwu jo se lětosa póbitowało. A pśecej zas jo pśi tom zajmne zwěsćiś, kake stare pókłady w młogich lodkach drěmocu.