Ze Žylowa/Sielow. Ze slědnym kóńcom tyźenja w juniju, ak sy hyšći bejnje do znoja pśišeł, njejo był k pśirownowanju prědny kóńc tyźenja julija, toś sy skerjej hyšći jacku trjebał. Pśi tom jo to pśi lětosnem kopańcowem turněrje Domowiny/Domowina Fußball Cup weto góruco doprědka šło – ging heiß her, tak se pó nimsku groni. Zapśimujuce a zapalone graśa su se wuwili, pśedewšym, ako jo finale se pśibližył. Sedym mustwow jo se na turněrje wobźěliło. Mjazy nimi jo dało dwě grajnej zjadnośeństwje (Spielgemeinschaften) – take jo stwórił magiski tśirog Barbuk, Móst a Janšojce. We toś tom zjadnośonem mustwje jo teke grała Paula Simulic z Barbuka. Wóna jo teke w Serbskem wuběrku pla žeńskich aktiwna grajaŕka. Jadnučka grajaŕka pśi Domowinskem turněrje njejo była, teke mjazy górjańskimi grajarjami jo była žeńska. Rogozno a Škódow stej twóriłej „Spielgemeinschaft Spreebrücke“.