Ako Domowina župa Jakub Lorenc-Zalěski z.t. smy dostali tužnu powěsć, až jo Dieter Liebig 19. junija, jano někotare dny do swójogo 75. narodnego dnja, pó krotkej śěžkej chórosći zemrěł. Domowina župa Jakub Lorenc-Zalěski z.t. jo někotare lěta z něgajšnym fararjom, krajnym raźcom Zgórjelskego wokrejsa a spisowaśelom gromaźe źěłała. Smy wěźeli wó jogo wuwiśu, wó zgubjenju Nimskego Osiga pśez jamu Grodnoj, wó pśesajźenju a nowotwari cerkwje do Zgórjelca-Kralow. Ze zgubjenim domownje a nowego zachopjeńka zaběrašo se wón w knigłowych zwězkach, kótarež su pód titelom „Report – Deutsch-Ossig“ wujšli. Smy wěźeli, až jo se zaběrał pśez wše te lěta ze změnami krajinow wuglowych jamow we Łužycy. A tak smy jogo 2010 pšosyli, teke pódpołnocny źěl wokrejsa – rum Rychwałd, Hamor, Wochozy, Slěpe – zapśimjeś. Z togo jo nastała drogowańska wustajeńca za ewangelsku wósadu Slěpe. Z pódpěru našeje dušepastyŕki jamy smy pomagali něgajšnemu fararjeju, kontakty k wót pśesedlenja pótrjefjonym nawězaś. Nastała jo wustajeńca „Což witśe buźo, jo cora było“.