Z Rownego/Rohne. Raz wob lěto wuraźujo Póraźujucy wuběrk za pšašanja serbskego luda pśi Zwězkowem ministaŕstwje nutśikownego. Wón ma nadawk, wšykne serbski lud nastupajuce pšašanja, kótarež maju wuznam za zwězk a kraje, rozpominaś. Slědny tyźeń stwórtk jo se wótměło wuraźowanje togo wuběrka na Njepilic dwórje w Rownem. Dłujkodobnje zawěsćone financěrowanje Załožby za serbski lud, skšuśenje pšawow narodnych mjeńšynow kaž tek trajne zakokulenje serbskeje rěcy a kultury su byli mjazy temami, kenž jo rozpominał Dawid Statnik w zgromadnej rozpšawje Domowiny a Załožby za serbski lud na tom pósejźenju Póraźujucego wuběrka za pšašanja serbskego luda. Wjednik wuběrka, społnomócnjony (Bevollmächtigte) zwězkowego kněžaŕstwa za narodne mjeńšyny, dr. Bernd Fabritius, jo chwalił serbsku wokolinu w Rownem. Wuběrk jo se prědny raz w srjejźnej Łužycy schadał. Lubosnje stej wuwitałej Hermašojc manźelskej gósći w serbskej drastwje z klěbom a solu.