Z Města/Cottbus. Alternatiwny bydleński projekt „Zelle 79“ w Chóśebuzu jo se slědny tyźeń w nocy na stwórtk napadnuł – jo to był wót njeznatych wugbany pódpaleński njestatk. Policaja to pśespytujo dla wopytanego mordaŕstwa. Teke statny šćit jo inwolwěrowany. Mimo togo jo se tejerownosći chóśebuska kulturna městnosć a młoźinski klub „Chekov“ napadnuła. Teke tam jo wogeń se nakładł, pśi drjewowem płośe. Lěc wobstoj zwisk mjazy tyma njestatkoma, se pśespytujo.

Pó pódaśach iniciatiwy „Wěste městna w pódpołdnjowej Bramborskej“ stej dwa napadowarja pódpalidła na dom „Zelle 79“ na Parcelowej droze chyśiłej. Stej byłej carno zdrastwjonej, jaden, se groni, jo nosył carno-běło-cerwjenu štormowu hawbu. Policaja z togo wuchada, až tej paršonje póchadatej z ekstremnje pšawicaŕskego spektruma.

Wušy šołta Tobias Schick zasuźujo te napady a se wugronijo za to, se staraś za rědowanja, aby se zmóžniło zaměrne doglědowanje pśez kamery we zjawnem rumje.