Z Grodka/Spremberg. To jo bźeze cwiblowanja był wósebny wjerašk togo lětosnego wót Lausitziady pśewjeźonego programa „Mója wěc jo, ako ju łapjom“: Kati Sprigodojc jo interpretěrowała sonet Miny Witkojc „Mjatel“ (1946) w ramiku eksperimentelneje live-performance k nowo komponěrowanej elektroniskej muzice. DJ Duo Mystica (Anika Kruse a Meike Grabinski) jo pśi měšańskem pulśe agěrował. Dalšne na tom muzikowem projekśe wobźělone su byli Paul Geigerzähler, Jakub Gruhl (muzikaliske póraźowanje) a Christiana Piniekowa (rěcne póraźowanje – a z jeje głosom jo se w serbskej rěcy ten jawišćowy pśinosk pśipowěźeł). Mimo togo jo ilustratorka Antje Rohter kresleńsku live-performance k tomu pśewjadła, ak jo se pśecej zasej na wjeliku wobrazowku projicěrowała. Ceła performance (kótarejž jo Nowy Casnik w Grodku na tamnem jawišću pód gołym njebjom slědował), premjera, jo pód kóžu šła a jadnorje wjelgin zajmnu, dłymoko gnujucu wašnju bitowała, znatu baseń Miny Witkojc dožywiś, kótaraž napomina serbski lud k sebjewědobnemu rozwijanju.