Z Hanovera jo nas w Serbskem muzeju Chóśebuz tužna powěsć dojśpiła. Źowka tśeśego naroda Sybille Küster jo nas informěrowała, až Karl-Heinz Drabow, enkelsyn serbskego mólarja Carla Nowaka (1873-1959), jo dnja 28. maja 2026 w starstwje wót 90 lět w Hannoverje zemrěł. Serbski muzej jo pśez enkelsyna pśed něźi 30 lětami wažne informacije wó žywjenju a statkowanju mólarja wuzgónił, dokulaž jo dostał a wobchował jogo derbstwo. Pśez pśipad a informaciju wót fararja Herberta Nowaka, kenž jo znał familijowe mě źowki Drabowa, jo se droga do Hannovera a k zawóstanku namakała.

Enkelsyn Karl-Heinz jo pótom muzejowe źěło mócnje pódpěrał pśi prědnej wobšyrnej wustajeńcy „Carlo Nowak ... zabyty mejstaŕ“ z twóŕbami z derbstwa starego nana. Ako jo mólaŕ tegdy w lěśe 1955 do Hanovera śěgnuł, su se we Łužycy te nitki k njomu zgubili.

Tak jo muzej akle pśez Karl-Heinz Drabowa zgónił, až jo tam w lěśe 1959 zemrěł.

Nejžpjerwej smy dostali wobraze ako póžyconku wót familije. W běgu casa smy mógali někotare twóŕby kupiś, ale wjele zajmnych akwarelow a mólbow smy darjone dostali. Za to smy wjelgin źěkowne.