Z Města/Cottbus. Njeglědajucy na wusoke temperatury jo se klubownja Serbskego doma slědny tyźeń srjodu z wjelimi zajmcami połniła, kótarymž jo se nowa publikacija Serbskego instituta (SI) pśedstajiła. „Kulturelle Diversität und Immaterielles Kulturerbe – Forschung, Beratung und Praxis im Dialog“ jo titel tych kniglickow, kótarež su gano ako 41. zwězk w „Małem rěźe“ wót SI wujšli. Wutšobnje jo Ines Kellerowa wót SI na tom wótpołdnju pśibytnych nosarjow žywego kulturnego derbstwa wuwitała, mjazy nimi zastupnikow Domowiny a Serbskich rybakarjow, kaž teke towaristwa a aktery, kótarež toś tych nosarjow žywego derbstwa do seśi zwěžu, ako to cynje na pśikład Błośańske towaristwo (Spreewaldverein) a UNESCO 5 – Derbstwo Łužyce. Wósebny póstrow jo płaśeł Sylce Laubenstein-Poleńcojc wót Załožby za serbski lud. Pśeto akle pśez spěchowańske srědki załožby stej to slěźenje a toś ta knigłowa publikacija móžno byłej.