Zachadny pětk jo 51 abiturientow a abiturientkow swóje skóńcne wopisma na Dolnoserbskem gymnaziumje dostało. Pśi wjelikej górcośe jo 12. lětnik slědny raz w awli šule gromadu pśišeł, aby w swěźeńskej góźinje skóńcenje šulskego casa swěśili. Šulski wjednik dr. Mattias Guttke jo wótwórił tu góźinu. W nagronje jo wšyknym absolwentam a absolwentkam gratulěrował a dobry start do nowego žywjeńskego wótrězka žycył. W programje togo dnja jo teke šulski chor pód nawjedowanim Geralda Šejna wustupił a jo tśi serbske spiwy zgłosył.

Pótom su wšykne swóje wopisma dostali. Nejlěpša censura jo 1,3, což stej dwa wuknika dostałej: Luca Schulze a Charles Emil Młynk (Müller). Pśerězk wšyknych censurow jo 2,3 we toś tom lěśe.