Z Města/Cottbus. Na slědnem posejźenju měsćańskego parlamenta w Chóśebuzu, 24. junija, su wótpósłańce a pśibytne gósći wšake słyšali a zgónili wó aktualnem žywjenju Serbow w Měsće. To groni: teke w Žylowje, Depsku, Rogoznje, Zaspach a dalšnych źělach Města. Zagronita za serbske nastupnosći w Měsće Ana Kosacojc-Kozelowa ga ma nadawk, wob lěto raz rozpšawiś wó swójom źěle a wó tom, kak se Město docełego wó to serbske stara.

Jeje rozpšawa jo była bejnje wobšyrna, togodla jo jano to nejwažnjejše pśednjasła. Cłonki parlamenta pak dostanu w pisnej formje cełu rozpšawu.

Nejwažnjejšy dypk w rozpšawje jo było serbske šulstwo w Měsće. Pśi tom jo musała k wěsći daś, až njejo se bóžko hyšći raźiło, až se w nowej zakładnej šuli w Brunšwigu zawjeźo serbska wucba. Witała jo, až jo město Chóśebuz se za to zasajźiło, až buźo na Bramborskej techniskej uniwersiśe studium za serbskich ceptarjow.

W krotkej diskusiji wó tej rozpšawje jo se na to pokazało, až jo wjelgin wažne, až dej se to serbske, wósebnje ta rěc, hyšći wěcej pokazaś w cełem žywjenju w Měsće.