Z Kózlego/Casel. W kuždem lěśe wokoło dnja Jana se wótmějo w Kózlem, městnem źělu Drjowka, jańske rejtowanje. Lětosa jo to było njeźelu, 21. junija, źož su gósći mógali wobglědowaś tu tradicionelnu góńtwu za gluku.

A zasej jo to było późiwabne, kak małka wjas z wokoło 300 wobydlarjami móžo take něco organizěrowaś. Sobustatkujuce su musali wěcej ako tysac módrackow na pólach tergaś a pótom z módrych kwětkow sprocniwje z ruku wijanki plasć. Hyšći pśed schadanim słyńca su šli za wutkami (Seerosen) a syśami (Binsen), kenž su pózdźej wupyšnili kronu Jana. Pśed tym pak jo było w kózlańskej cerkwi namša. Ceła wjas jo była wufajnowana z wěncami, ako su rejtarje pśewóźone z muziku a źowćami w rědnych drastwach k rejtowanišćoju na kóńcu jsy wumaršěrowali.