Bastia. Mjazy Italskeju a Francojskeju lažy kupa Korsika. Oficialnje někak 250 lět francojska jo. Ma pak teke dłujke stawizny, teke z genueziskimi wliwami. Napoleon póchada z Korsiki. Do togo jo krotko eksistěrujuca republika Korsika w 18. stolěśu pód Pasquale Paoli prědnu demokratisku wustawu swěta měła – hyšći jěsnej ako na pśikład USA. Na kupje jo se wuwijała w běgu casa teke samostatna rěc. Jo to korsišćina, romaniska rěc ako teke francojšćina abo italšćina. Dej jich někak 100.000 do 200.000 powědajucych byś. Kupje se groni francojski na pśikład Corse, korsiski pak Corsica. Dokulaž Francojska ma mócnu centralnu politiku a pśipóznajo regionalne a mjeńšynowe rěcy jano ako regionalne derbstwo ale nic ako oficialne rěcy pódla francojšćiny, dłujki cas korsišćina zjawnje njejo wjeliku rolu grała. Korsiske su se pak lětźasetki dłujko wuwójowali wót francojskego stata wěcej awtonomije. Wót srjejźi 1970ych lět až do 2000 su teke teroristiski z namócu wójowali. Mjaztym jo pak stat regionoju we wuměnje za měr wěcej awtonomije dał. Pśez to teke korsišćina zasej wětšu rolu grajo.