Ze Złego Komorowa/Senftenberg. Bajkaŕka Monika Auer ze Złego Komorowa a zagronita za nastupnosći Serbow we wokrejsu Górne Błota Łužyca (OSL) Hanka Rjelcyna stej nimskorěcny projekt ze serbskim wopśimjeśim wuwiłej. Pód gronidłom „Wie der Wassermann in die Schwarze Elster kam“ pósrědnijotej wuknikam tamnjejšych zakładnych šulow wědu wó Serbach. „Źiśi wěźe rozdźělnje wjele wó Serbach w swójom žywjeńskem wobswěśe“, Hanka Rjelcyna wujasnijo, „pótakem pó-srědnijomy zakładne informacije.“ Pśi tom graju mjazy drugim wejsne a městne tofle wažnu rolu. Až doněnta jo jima jaden samy raz wuknik gronił, až jo měł zapśimjeśe pód nimskim mjenim města abo jsy na toflach za pólske. Drugim źiśam zewšym njejo było wědobne, až tam mimo nimskego teke napis w drugej rěcy stoj. Až doněnta su zakładne šule we Złem Komorowje, Carnem Gózdźe (Schwarzheide) a Łuchowje (Lauchhammer) póbitowanje pśewzeli, dalšne maju wótglědane to cyniś.