Z Města/Cottbus. „Młogi raz rozmějomy jadno městno akle, gaž jomu pśisłuchajomy“, jo groniła Susann Troppa, wjednica projekta „Derbstwo Łužyce“ (UNESCO 5) pśi zejźenju „Łužyske rytmy“ 5. junija we Łužyskej wuměłstwowej hali Chóśebuz. Wugótowałej stej to mjazydisciplinarne zejźenje z rědom pśinoskow BTU Chóśebuz-Zły Komorow a Humboldtowa uniwersita Barliń. Susann Troppa jo w swójom pśednosku pśedstajiła akustiski dožywjeński projekt „Erbe der Lausitz/Derbstwo Łužyce“, kenž tych pěś UNESCO-pókładow a bogate serbske kulturne derbstwo regiona słyšabne cyni. Su napórali wšakorake audio-stacije, źož luźe su we wšednem dnju ducy. Ako pśikład jo wóna pomjeniła audio-staciju pśi dwórnišću w Lubnjowje. We akustiskem materialu, kenž jo publikumoju pśedstajiła, jo se słowo „Łužyca“ we tśich rěcach powědało. Serbski pśizuk njejo pšawy był. Ale teke originalne serbske spiwanje jo we pśinosku było słušaś. Głowna mysl pśi tom wótsłuchańskem projekśe, tak Troppa, njejo pówucyś, ale w prědnem rěźe: narskosć wubuźiś a tak zajm na wósebnosći a potenciale regiona schyliś.