Z Města/Cottbus. Prezidium Domowiny jo se zmakał wałtoru tyźeń w chóśebuskem Serbskem domje z pśedsedaŕstwom župy Dolna Łužyca. Cłonki gremiumowu su jubilaŕce Mariji Elikowska-Winklerowej ze tšojneju sławu źěkowali. Wuměniłej stej se pótom mjazy drugim wó wósebnem pśipóznaśu młodeje dolnoserbskeje ekscelence, wó skóńcenju doby Załožboweje rady a dalšnych projektach. Na kóńcu jo pśedsedaŕ Dawid Statnik pokazał na zapódaśe naraźenjow za Myto Domowiny (až do 30. junija) a Myto za góspodaŕstwo (až do 31. awgusta 2026) kaž teke na pśichodnu głownu zgromaźinu, 24. apryla 2027 w Brětni (Bröthen). Do FUEN-seminara za mjeńšyny mimo maminego kraja w Ljouwert/Leeuwarden w Nižozemskej pla Pódwjacornych Frizow su delegěrowali dr. Hartmuta Leipnera a dalšnej wósobje. Mimo togo se wobźěliju cłonki towaristwa Pawk ze zastupnikami drugich mjeńšynow na festiwalu Roskilde w Dańskej. Dalšny dypk jo był delegěrowanje a pśigótowanje pósejźenja Zwězkowego pśedsedaŕstwa pětk w Slěpem. Temy buźotej mjazy drugim pókšacowanje projekta ZARI a pówołanje sakskich zastupnikow za Załožbowu radu 2027-2031.