Z Města/Cottbus. W januarje 2001 jo Rěcny centrum WITAJ (RCW) chopił źěłaś z głownym nadawkom, serbsku rěc a dwójorěcnosć we Łužycy zdźaržaś, woplěwaś a spěchowaś. 25-lětny jubilej swójogo wobstaśa jo RCW južo w měrcu na familijowej schadowance w Budyšynje wóswěśił. Zajźony stwórtk jo chóśebuske wótźělenje WITAJ-centruma to, zwězane z dnjom serbskich pedagogowkow a pedagogow, nachwatało – jo na swěźeńske zarědowanje do klubownje Serbskego internata pśe-pšosyło. Wjednik dolnołužyskego wótźělenja Bernd Melcher jo jadnab 50 serbskich ceptarjow a gósći – mjazy nimi pśedsedarja Domowiny Dawida Statnika, wjednicu RCW dr. Beatu Brězanowu kaž teke něgajšnych sobuźěłaśerjow RCW – pówitał. Tomu jo se Gerald Šejn ze spiwanymi słowami „Lubše luźe witajśo, na ten swěźeń wjasoły“ ze spiwa „Źins jo swěźeń“ pśizamknuł. Wón jo muzikaliske pśewóźowanje za swěźeńske wótpołdnjo pśewzeł. Beata Brězanowa jo gódnośiła wupominajuce źěło swójich kolegow w Dolnej Łužycy, źož woplěwaju „serbšćinu w małych rěcnych rumach“ a muse „zwěrnje gromadu źěłaś a se mjazsobu pógónjowaś“.