Ze Kśišowa/Krieschow. Šesćźasetlětny jubilej ma se słušnje wóswěśiś. A tak su dožywili wuknice a wukniki kśišojskeje zakładneje šule wót 3. do 5. junija tśi cele wósebne dny. Wjerašk jo był wjeliki šulski swěźeń srjodu, kenž jo bitował zachopk tych swěźeńskich dnjow. Za program su źiśi južo dłujko do togo zwucowali a z wjelikeju radosću su prezentěrowali sebje a swóju šulu. Južo pśi wótwórjenju jo se pokazała wjelerakosć teje skerjej małeje šule. Nic jano w nimskej a serbskej rěcy – teke we někotarych dalšnych rěcach su se gósći pówitali.