Z Bělowa/Behlow. Wósym wandrarjow a wandraŕkow, mjazy nimi ja, jo se sobotu zmakało pla Bělowa, małkeje jsy blisko Luboraza. To njejo było zmakanje pśijaśelow, ale wulět, kótaryž jo organizěrowała Šula za dolnoserbsku rěc a kulturu. To wandrowanje jo było prědne take pó dłujkem casu, a my smy se wjaselili, až móžomy njeznaty kus našeje Łužyce póznaś, gromaźe z tyma wjednikoma biologom Gregorom Wieczorekom a botanikarjom Jensom Martinom.