Z Města/Cottbus. Mina Witkojc jo pśed 133 lětami, dnja 28. maja, se naroźiła. Ku tej góźbje jo Serbski muzej Chóśebuz pśepšosył na wósebny koncert a na muzikaliski hommage ze serbsko-pólskim duo Walburga Wałdźic a Izabela Kałduńska na swójom dwórje. Serbska spiwaŕka a pólska wiolinistka stej swój wuznamnej basnikaŕce pócesćony album „Za Minu“ na tom wjacoru jadnab 20 woglědarjam pśedstajiłej. Za źewjeś basnjow Miny Witkojc „smej nowe zuki namakałej w našej muzikowej rěcy“ jo Walburga Wałdźic publikumoju wulicowała. Tak stej muzikaŕce pśisłucharjow na poetiske a muzikaliske drogowanje pó stwórjenju błośańskeje basnikaŕki sobu wzełej. Mjazy basnjami, kótarež stej muzikaŕce zacuwaty do rěcy muziki pśełožyłej, su byli „Pšosba k poeziji“, „Majska noc“, „Požedanje“ a „Ja wiźech rěcku slobranu“. Melodije k dweju kusowu – „W śichej nocy“ a „Kolebawka“ – jo pólski muzikaŕ Maciej Rychły skomponěrował.