Z Grodka/Spremberg. Na Grodkojski swěźeń dujaŕskeje muziki su se Grodkarje a jich gósći južo wjaselili a su swětkownicu w bogatej licbje k jawišćoju pód gołym njebjom pśichwatali. Michael Apel (Spremberger Kino- und Kultur GmbH) jo jich wuwitał ze słowami: „Darijomy Grodkarjam źinsa ceły źeń połny dujaŕskeje muziki“. Styri łužyske kapały su pśepšosenjeju slědowali: Weskower Blasmusikanten, Chóśebuske Dixieland Stompers, Lustige Musikanten z Derbna (Döbern) a Lausitzblech. „Wjascanarje“ (Weskower) su wustupali z ekstra programom – zgłosył jo se „Spitzbubenpolka“, kenž se póśěgujo na legendarnego rubjažnikowego hejtmana Lauermann. Ten jo wugbał w 18. stolěśu wokoło Grodka swój njerod. A titel „Spremberger Musikanten“ jo slědny grodkojski měsćański muzikowy direktor Siegfried Kalwack (†) skomponěrował. Pśiklask su sebje teke Dixieland Stompers pód nawjedowanim Horsta Kaschube zasłužyli. Jich program w stilu dixieland-jazza jo se skóńcył z wóterymi pśidankami. Pótom su te w lěśe 1969 wót Siegfrieda Korle (†) z Bóšojc (Bohsdorf) załožone „Lustige Musikanten“ na jawišćo stupali.