Z Rownego/Rohne. Wabjenje za to tšojenje wšak jo se w Nowem Casniku a w programje RBB cynilo. By to wuspěch měło. Na tom kóńcu tyźenja su byli dosć zarědowanjow we wósaźe. Tam jo było gwězdne kólesowe drogowanje wokrejsa. Pótom chytanje majskego boma w Rownem a tak dale. Weto smy byli pśechwatane, až pśiźo tak wjele luźi njeźelu dopołdnja na Njepilic dwór. Njeglědajucy na te wjele tšojenjow kóńc tyźenja w Slěpjańskich stronach smy mógali njeźelu na Njepilic dwórje wurědny spiwański program dožywiś. „Pśěza ze Zły Komorowa“ z Ginterom Paulišom jo sebje wón za swój lětny wulět Rowno wuzwólił. A z našym naraźenim, ned to ze zajtšnym piwkom zwězaś, toś smy zagnali pla Pawliša wótwórjone źurja. Lěcrownož wjele jogo cłonkow towaristwa su gronili, až njamógu serbski powědaś, jo se ceły repertoire jano w dolnoserbšćinje pśednjasł. Dokulaž smy Rownjany sami wjele spiwow znali, smy sobu spiwali. Pó wobjeźe a wjeźenju pó dwórje su se Rownjarje wuźěkowali pla Złykomorojarjow ze swójim Slěpjańskim spiwnikom. Snaź móžomy toś te wót serbskeje muziki zagórjone cłonki zasej raz słyšaś.