Z Trjebina/Trebendorf. Jo zasej cas, w kótaremž swěśe źiśecy źeń ze wšakimi swěźenjami. W Trjebinje na Šusteroc dwórje jo familijowy swěźeń k tradiciji wordował. Njeźelu jo se jen pěty raz wótměł. Małe a wjelike su se zmakali, aby w spódobnej runźe gromadu sejźeli a za źiśi su měli se wě młoge pśechwatanki.

To jo był prědny familijowy swěźeń pód režiju nowego pśedsedaŕstwa Domowinskeje kupki Trjebin. Wšak jo Angelika Balccyna w nazymje wó to pšosyła, ju wót nadawkow pśedsedaŕki wulichowaś. Pó 17 lětach njejo to žeden źiw, pśeto nichten njewordujo młodšy. Naslědnica abo naslědnik njejo se wuzwólował(a). Skerjej jo se pśedsedaŕstwo ze sedym cłonkami prědk wzeło, to wjednistwo gromaźe pśewześ a zagronitosći wótpowědnje rozdźěliś. Z tym jo pśedsedaŕstwo rownocasnje se womłoźiło. To derje funkcioněrujo. A teke Angelika Balccyna hyšći aktiwnje sobu źěła w Domowinskej kupce. Cele wopśestaś wšak njamóžo.