Pód titelom „Institutionalisierung von Sprachplanung. Bericht und Thesenpapier zur internationalen Konferenz ‚Language revitalisation planning: structures and processes‘ Cottbus/Chóśebuz, 8.-9. Mai 2025“ wózjawijo Serbski institut 11. zešywk we rěźe spisow „Sorabistiske źěłowe papjery“.

Nowa źěłowa papjera pśiwobrośijo se institucionalizěrowanju rěcnego planowanja. To jo tema, na kótaruž jo se dotychměst we slěźenju mało glědało. Awtory a awtorki publikacije – Anastasija Kostiučenko-Kessler, Měto Nowak, Julia Běrinkowa, Lutz Laschewski a Sophie Rädel – pšašaju za strukturami a procesami za efektiwne, koordiněrujuce rěcne planowanje wobeju serbskeju rěcowu: Kak by wóno musało se organizěrowaś? Kake nazgónjenja z drugich europejskich mjeńšynowych regionow by mógli se na Łužycu pśenjasć?