Južo ako góle, wót togo casa, ak jo wuměła cytaś w běgu prědneje rědownje, jo Ingrid Hustetowa jadne knigły za drugimi „póžerała“. Jo lubowała tšojeńka! Wšak njejo se jej ako góle hyšći widało, až sama buźo teke raz napisaś a wózjawiś literarne teksty w bogatej licbje, a to nic jano w nimskej, teke w serbskej rěcy! Wóna jo znata ako awtorka, jo mimo togo pśełožowaŕka (serbski, nimski) a wudawaŕka antologijow. Ku góźbje jeje 70. narodninow (pśipadnje – abo tek nic tak pśipadnje – samski narodninski datum ako pla Miny Witkojc) comy jej hyšći wutšobnje gratulěrowaś – a raz pitśku dokradnjej póglědnuś do jeje žywjenja a statkowanja.