Z Města/ Cottbus. Zajźony pětk jo pśez chóśebuske drogi źewjeś studentow Uniwersity Viadrina w Frankobroźe chójźiło. Wóni su ga měli wósebnu ekskursiju do swěta Serbow, aby wěcej wó Serbach w Dolnej Łužycy zgónili. Za nich ga su mjeńšyny wěsty źěl swójogo studiuma na pólu kulturnych wědomnosćow. A za to su do wótźělenja Serbskego instituta pśišli, aby tam nejpjerwjej mały pśednosk słyšali. Šyman Blum a Evan Bleakly stej toś ten pśednosk źaržałej a studěrujuce su kradu zajmowane byli, tak až su wjele, wjele pšašanjow stajali. Wósebnje za nałogi Dolnych Serbow a Serbowkow su se zajmowali a dopšašali, źo a ga mógu sebje take spektakularne tradicije ako łapanje kokota woglědaś. Pśi tom jo było wšykno w engelskej rěcy, dokulaž jano mało studentow jo mógało nimski powědaś. Někotare wót nich su w Erasmus-programje (EU-program za spěchowanje wukubłanja, młoźiny a sport, zmóžnijo studěrujucym, semester we wukraju absolwěrowaś) a pśidu z drugich słowjańskich krajow ako z Ukrainy.