Z Bórkow/Burg. Florian Krause, Leonhard Sander, Alexander Ramisch a Emilia Kolitschojc wót Dolnoserbskego gymnaziuma su pónjeźele pśi Błośańskej nocy powěsćow na bórkojskej Grodowej górje tych woglědari w nadawku bórkojskeje turistiskeje informacije napšašowali. „Tak se něco pśizasłužujomy za naš abi-bal, aby njewordowali kórtki hyšći droše“, su rozkładli te styri wukniki. Wót wjele woglědari su zgónili, až su južo cesto pśi tom zarědowańskem formaśe pódla byli. To njejo źiw, pśeto swětkowne pónjeźele jo dotychměst juž pśecej był źeń za domorodnych. Dowolarje pśidu głownje sobotu a swětkownu njeźelu. Tak jo to 2026 zasej było. Pśišło jo 5.000 pśiglědari. Wót pśiducego lěta wšak njebuźo Błośańska powěsćowa noc wěcej k swětkam, ale změju drugi termin.