Z Města/Cottbus. „Cerkwje su wótworjone rumy za wšykne“ – pód toś tym motom pśepšosyju cerkwje wót lěta 2002 w Chóśebuzu a Barlinju na noc wótwórjonych cerkwjow ku swětkam z wósebnymi programami abo póbituju luźam, swóje rumy dožywiś abo se daś do rozgrona. Tak jo se swětkownicu wótměł na iniciatiwje Spěchowańskego towaristwa za serbsku rěc w cerkwi (STSRC) zasej serbski program. W małem rumje Ewangelsko-metodistiskeje cerkwje Chóśebuz jo žeńskecy ansambel Jarobinka pód nawjedowanim Walburgi Wałdźic woglědarjow ze serbskimi spiwami zagórił. Pśewóźowała jo ansambel wiolinistka Izabela Kałduńska, kótaraž jo z pomocu efektow a loopera swóje fidlowe zuki pśeměniła do skóro orchestralnych zukow. Ze tymi za film „Pla nas gronje jej Hanka“ wobźěłanymi wersijami ludowych spiwow kaž „Stoj ta lipa“, „Ty sy taka wijkotata“ abo „Gołbjašk dwě běłej nožce ma“ na dolnoserbski a slěpjański su žeńske publikum gnuli.