Z Města/Cottbus. Stwórtk, 21. maja, jo pśepšosył projektowy team SROKA na swóju mjaztym tśeśu źěłaŕnicku, w kótarejž jo stojało pšašanje w fokusu, kak móžo se dojśpiś, až budu serbska rěc a serbske temy wěcej widobne a słyšabne w (nimskich) regionalnych medijach. Pśepšosenjeju projektowego teama do kafeterije Dolnoserbskego gymnaziuma jo slědowało wokoło 25 zajmcow, mjazy nimi tek cłonki strategiskeje kupki a styri se na podiumje wobźělujuce zastupnice serbskego medijowego swěta. Raźi by pśi zarědowanju teke wiźeli wuknice a wukniki seminarnego kursa „serbski žurnalizm“, ale jich z pśepšosenim dojśpiś, njejo se pšawje raźiło.