Ze Serbskego Domu/Wendisches Haus. Ze slědnego tyźenja wise w klubowni Serbskego doma na tśich wjelikich sćěnach nowe wobraze. To groni, až jo Lodka tam wugótowała nowu wustajeńcu. Chtož se woglědajo prědny raz tam wisece wobraze, ten se mysli, až su to rědne fotografije, tak akuratne wóni su. Ale fota to njejsu, ně, to su napšawdu ze šćotku a barwami napórane wobraze! Bernd Steinbrenner z Města jo je „naźěłał“. Pśi wótwórjenju, na kótarež jo pśichwatało jadnab 50 gósći, jo wuměłc wulicował, kak jo k takemu mólowanju pśišeł.

Naroźił jo se w Póznanju (źinsa Pólska) a gromaźe z familiju su śěgnuli pó wójnje do Šlichowa, źož jo teke pśežywił swój źiśecy a młoźinski cas. Pó abiturje 1960 jo wuknuł na mechanikarja za rozgłos a telewiziju. Za to jo měł ako młoźeńc južo pśecej wjele wušej. Za tym, až běšo swójo wukubłanje ako rucnikaŕski mejstaŕ zakóńcył, jo kśěł něco nowego cyniś. „Ako su pytali na Bramborskej techniskej uniwersiśe jadnogo, ako se wuznajo w fyzice, som se tam pśipowěźeł. W mójom źěle som musał pśecej kradu eksaktny byś, som dejał źiwaś na małkosći a detaile“, jo wón gronił.