Z Lipska/Leipzig. Institut za Sorabistiku lipšćańskeje uniwersity jo organizěrował dnja 24. apryla konferencu pód titelom „Sociolinguistika wšednych rěcow 110 lět pó jatšownem zběžku“. Jatšowny zběžk 1916 jo wažnu rolu grał za njewótwisnosć Irskeje wót Wjelikeje Britaniskeje a z tym teke za wuwijanje iršćiny ako oficialna rěc stata. Irska republika jo financielnje pódpěrowała zarědowanje, tak ako teke financěrujo studěrowanje iršćiny w Lipsku ako źěł kulturneje politiki. Pó wuwitańskich słowach dekana a zastupnika irskego wjelikopósłaństwa jo prof. Wornaŕ, dłujkolětny wjednik Instituta za Sorabistiku, dał pśeglěd k stawiznam lipšćańskeje sorabistiki. Lutz Laschewski, Anastasija Kostiučenko-Kessler a Měto Nowak wót Serbskego instituta w měsće su pśedstajili źěło wótźělenja za regionalne wuwiśe a šćit mjeńšynow, situaciju dolnoserbšćiny a projekt SROKA za wóžywjenje rěcy. Konrad Szymanowski jo pśedstajił mjazystaw swójogo slěźenja k nastajenjam luźi napśeśiwo dolnoserbskej rěcy ¬– takich luźi, ak źěłaju w institucionelnych wobłukach.