Z Pódstupima a Drježdźan. Dajo zwězkowu iniciatiwu Šleswig-Holštejnskeje, kenž dej regionalne a mjeńšynowe rěcy w markowem pšawje Europskeje unije lěpjej šćitaś. Kraj Bramborska a Lichotny stat Sakska wobej pódpěrujotej toś tu iniciatiwu. K tomu jo dało južo srjejź apryla wobzamknjenje kabineta w Bramborskej, a 21. apryla jo slědowało kabinetowe wobzamknjenje w Sakskej. Tuchylu jo tak, až by mógali pśedewześa a koncerny mjeńšynowe zapśimjeśa se daś šćitaś ako marka a pótom drugim zakazaś je wužywaś. Rbb jo rozpšawił, až něco pódobnego jo se stało z friziskim słowom „Öömrang“, ako wopisujo tamny dialekt. US-firma jo se to mě dała šćitaś a lokalne friziske pśedewześe jo było nuzkane swójske produkty pśeměniś. Take něco by mógało teke se staś ze słowami „Błota“, „mlince“ abo „Witaj“, jo groniła kulturna ministaŕka Bramborskeje Manja Schüle.