Z Lipska/Leipzig. Nowe serbske wuměłstwo jo domownja Bernharda Schippera. Wustajeńca pokazujo něnto pśeglědku tśich lětźasatkow statkowanja wuměłca, kenž ma łužyske a serbske kórjenje. Zachadny stwórtk su ju oficialnje wótwórili.

Kužda twóŕba, tak jo měniła kuratorka Anja Mutschler, jo kaž portal do nowego swěta. Slědny stwórtk jo wóna zgromadnje z wuměłcom Bernhardom Schipperom wustajeńcu „... aber war stets gut informiert“ wótwóriła. Galerija KK5 w Lipsku pokazujo tu dotychměst nejwobšyrnjejšu pśeglědku twóŕbow Schippera – dogromady jo jich 109, pśewažnje plastiki, ale teke grafiske źěła. Schipper sam se pśi tom mjenjej ako twórjecy wuměłc, ale skerjej ako „spekulatiwny archeologa“ rozmějo. To groni, až wón objekty wšednego dnja do nowego konteksta staja. Kuratorka Mutschler jo w swójej nagronje pśispomnjeła, až moderny archeolog pśi tom za swójimi artefaktami wěcej ryś njetrjeba, wón je ga cesto na platformach w interneśe nadejźo. Wósebnje „ostalgiske“ a serbske elementy wón pśi tom do nowych kontekstow pśinjaso.