Z Města/Cottbus. Stwórtk, 30. apryla, su se zmakali wušy šołta města Chóśebuza Tobias Schick, bramborska kultusowa ministaŕka Manja Schüle a nutśikowny ministaŕ Jan Redmann w chóśebuskej synagoze ze zastupnikami žydojskeje wósady. Na samskem dnju wjacor jo iniciatiwa „Sichere Orte Südbrandenburg“ napominała na demonstraciji pśeśiwo pšawicaŕskej namócy se wobźěliś. Wót Pisanego dwórnišća jo wušej hundert luźi pó měsće śěgnuło. Pśicyna za to su byli wótere nejskerjejše pšawicaŕske tšojenja a pokuśeńske statki (Straftaten) w zajźonych tyźenjach w měsće. Južo srjejź apryla stej towaristwo „Opferperspektive“ a iniciatiwa „Sichere Orte Südbrandenburg“ rozpšawiłej wó dwěma padoma: Jadnomu fararjeju, kótaryž se angažěrujo pśeśiwo pšawicaŕsko-ekstremizmoju, jo se grozył pśed swójim bydlenim a jadnej wósobje jo se nukał. Slědny tyźeń apryla su njeznate chyśili swětłowu pochornju (Leuchtfackel) do wjaže alternatiwnego bydleńskego projekta. Na sćěnu chóśebuskeje synagogi su našmarali antisemitiski špruch a kokulatu kśicu.