Z Gołkojc/Kolkwitz. Gołkojski šołta Karsten Schreiber jo njedawno na lětne pśiwitanje wjelikeje gmejny do Kolkwitz Center pśepšosył. Zastupniki góspodaŕstwa a politiki z gmejny a susednych komunow su slědowali jogo pśepšosenju. W swójich wuwjeźenjach jo dał šołta póglěd na pśedewześa lěta 2026 a na 2027. Tak natwariju lětosa w Kósobuzu kontejnerowe twarjenje za młoźinu. W Glinsku/Glinzig wutwariju a saněruju zgromadny wejsański dom bźez barierow. W Górnej/Milkersdorf kśě rozšyrjaś wobydlaŕske zmakanišćo. Z tymi napšawami se póbituju lěpše wuměnjenja za woplěwanje serbskich tradicijow, na pśikład za pśewjeźenje zapusta. Pólěpšenja su teke pśedwiźone za wognjowu woboru w Popojcach/Papitz a Dalicu/Dahlitz. W nowem twarjenju budu se kamerady wobeju wognjoweju woborowu derje cuś a z tym změjo fuzija dobre startowe wuměnjenja. W Gołkojcach spóraju staru wognjowu wachu do rěcha a tak se tradicije zachowaju. 2026 zachopijo se skóńcnje dwójokólejowe wutwarjenje śěgoweje cery Chóśebuz-Barliń.