K Lego-dnju w měrcu na žylojskej šuli su pśišli teke źiśi ze źiśownje „Skadower Blümchen“ na woglěd. Za wjele z nich jo to było zeznaśe swójogo pśichodnego kubłanišća. 
Ze Škódowa/Skadow. Źiśownja „Skadower Blümchen“ jo mógała 2023 wuběźowanje pó cełej Nimskej w ramiku spěchowanja „Förderfuchs“ wót Załožby dr. Hansa Riegela dobyś. To jo jim wunjasło financielnu pódpěru we wusokosći 25.000 euro. Załožba co z tym programom wobźělnikam pokazaś, kak móžo tak pomjenjone MINT-kubłanje wuspěšne a zapśimujuce byś. MINT jo akronym za fachowe wobłuki matematika, informatika, pśirodowěda a technika.
Wósebnje wobšyrnje su mógali se wótkubłaŕki źěkowano tej pódpěrje MINT-temam na wšakich městnach w Nimskej pśiwobrośiś – pśi zmakanjach, seminarach a dalejkubłanjach. Dobyte dopóznaśa kśě swójim woplěwańcam dalej daś.
