Z Budyšyna/Bautzen. Projektowa managerka Domowiny jo k wěsći dała, až jo se na lětosnem wuběźowanju wó nejrědnjejše serbske jatšowne jajo źiśi a młodostnych „77 jadnotliwcow wobźěliło“. Mytowałej stej w nadawku Spěchowańskego koła za serbsku ludowu kulturu jurorce Sonja Hrjehorjowa (wjednica kulturnego wobłuka projekta ZARI) a Andrea Pawlikowa (muzeologowka, Serbski muzej Budyšyn) we wósym starstwowych kupkach – wót styri do 24 lět. Swój rozsud stej jurorce pětk, 17. apryla, wuzjawiłej. Lětosa jo Spěchowańske koło, zarědowaŕ togo wuběźowanja, zasej młoźinske spěchowańske myto pósćił, kenž jo z 75 euro dotěrowane. Dobyśaŕka jo 23-lětna Lenka Zachariasojc z Grodka (Spremberg), kótaraž jo se z techniku wóskowanja wobźěliła. Jej wutšobna gratulacija!