Z Dešna/Dissen. Wjelim jo wóna znata ako dłujkolětna referentka Rady za serbske nastupnosći w krajnem sejmje Bramborskeje. Ale až jo Birgit Ginkelowa we priwatnem žywjenju wobdarjona wuměłcowka, to źe jo za młogego pśechwatanka. Njeźelu, 19. apryla, jo se wótwóriła wustajeńca ze šyroko rozrědowanym prěcnym rězom jeje twórjenja w Domowniskem muzeju Dešno, a to pód titelom „Błyšćate dundanje/Ein funkelnder Streifzug“. Toś ten titel juž pokažo na nadpadnu wósebnosć wjele twóŕbow Birgit Ginkeloweje: Rada wóna we nich pśeźěłajo błyšćate materialije kaž zemlate kamuški abo drogotne metale. Pśi tom wšak njejo ten „błyšć“ ako taki to bytostne – ale symboliski wóznam materialijow a te cesto dłymoko gnujuce zmakańske momenty a tšojeńka, do kótarychž wěste twóŕby nas wjedu.