Z Pódstupima/Potsdam. „Witajśo k nam na BTU!“ Z tymi serbskimi słowami jo wiceprezident Bramborskeje techniskeje uniwersity Chóśebuz-Zły Komorow dr. Peer Schmidt wabił zajmcow za studium wuceńskego amta za pśedmjat serbšćinu w primarnem schójźenku, kótaryž se zachopijo na campusu w Złem Komorowje. Zajźony pětk jo wón studium w pódstupimskem krajnem sejmje na medijowej konferency pśedstajił a na pśizamkujucem pósejźenju Rady za serbske nastupnosći w Bramborskej wó wěcej detailach kaž wó wótběgu a natwari studiuma powědał.