Z Drježdźan/Dresden. Srjodu, 8. apryla, jo se w sakskem kulturnem ministaŕstwje (SMWK) wótměła intensiwna wuměna mjazy krajoma Bramborska a Sakska tak ako ze serbskim kšywowym zwězkom Domowina. We srjejźišću su stojali temy sorabistika, rěcne wukubłanje, šćit serbskeje rěcy a serbskich tradicijow. Tak jo se mjazy drugim powědało wó zawjeźenju nowego studijnego póbitowanja za serbšćinu w primarnem schójźeńku na BTU Chóśebuz-Zły Komorow w zymskem semestrje 2026/27. A Bramborska a Sakska stej se wuměniłej wó móžnosćach, kak mógało se wobzamknjenje Zwězkoweje rady wó pśiwześu mjeńšynowego šćita do zakładneje kazni dalej pódpěraś. Wobej zagronitej za serbske nastupnosći, Tobias Dünow (Bramborska) a Franciska Brech (Sakska), stej mimo togo se wugroniłej za pódpěru iniciatiwy Zwězkoweje rady kraja Šleswig-Holštejnska k zmócnjenju mjeńšynowych rěcow w markowem pšawje wót EU (EU-Markenrecht).